پارلامەنت دەپۋتاتتارى «پرەزيدەنتتىڭ بەس الەۋمەتتىك باستاماسى» اتتى ۇندەۋىنەن تۋىندايتىن مىندەتتەر مەن تالاپتاردى ءتۇسىندىرۋ ماقساتىمەن وبلىسقا كەلىپ, ۇجىم مۇشەلەرىمەن كەزدەستى.
ءماجىلىس دەپۋتاتتارى سۆەتلانا بىچكوۆا, ايزادا قۇرمانوۆا, ايگۇل نۇركينا, ءجاميلا نۇرمانبەتوۆا, قانات مۋسين وبلىستىق ىشكى ىستەر دەپارتامەنتىندە بولىپ, كوشى-قون قىزمەتىنىڭ, جەدەل باسقارۋ ورتالىعىنىڭ, ۋچاكەلىك بەكەتتەردىڭ جۇمىستارىمەن تانىستى.ء وىىد-ءنىڭ باسشىسى, گەنەرال-مايور بەرىك ءبىلالوۆ ءوز سوزىندە 977 بەينەباقىلاۋ كامەراسى جۇمىس ىستەيتىنىن, بيىل 300 ميلليون تەڭگەگە 336 زاماناۋي قۇرىلعى ساتىپ الىناتىنىن جەتكىزدى. بىلتىر پايدالانۋعا بەرىلگەن جاتاقحاناعا 102 پوليتسيا قىزمەتكەرىنىڭ وتباسىلارى قونىستانعان. 40 قىزمەتكەر «نۇرلى جەر» باعدارلاماسى ارقىلى قولجەتىمدى باسپاناعا يە بولعان. 300 قىزمەتكەردىڭ پاتەر كەزەگىندە تۇرعانى ەسكەرىلىپ, الداعى ۋاقىتتا 100 پاتەرلى ءۇي تۇرعىزىلاتىن بولادى.
ا.نۇركينا «پرەزيدەنتتىڭ بەس الەۋمەتتىك باستاماسى» دەپارتامەنتتە اتقارىلىپ جاتقان شارالارعا وڭ باعا بەرىپ, ءبىرىنشى باعىتتىڭ ماڭىزدىلىعىن ەرەكشە اتاپ كورسەتتى. مەملەكەت تۇرعىنداردى قولجەتىمدى باسپانامەن قامتاماسىز ەتۋ مۇمكىندىكتەرىن جان-جاقتى قاراستىرىپ كەلەدى. ونىڭ ناقتى ءبىر مىسالى رەتىندە «7-20-25» باعدارلاماسىن ەرەكشە اتاپ ءوتتى. نەسيە مولشەرلەمەسى دە جەڭىلدەتىلدى, دەدى ول. باسقا حالىق قالاۋلىلارى جوعارى ءبىلىم الۋدىڭ ساپاسىن ارتتىرۋعا, اۋىلدىقتاردى شاعىن جانە ورتا بيزنەس سالاسىنا كوپتەپ تارتۋعا بايلانىستى ىرگەلى ىستەر جۇزەگە اسىرىلاتىنىن اڭگىمەلەدى.
№1 قالالىق ەمحانانىڭ ۇجىمىمەن وتكەن جۇزدەسۋدە سۆەتلانا بىچكوۆا, ءجاميلا نۇرمانبەتوۆا, تاعى باسقالارى جالاقىسى تومەن جۇمىسشى-قىزمەتكەرلەردىڭ ەڭبەكاقىسىن كوبەيتۋ باعىتىندا ۇكىمەت تاراپىنان قوسىمشا قارجى بولىنەتىنىن ايتتى.
سەناتور ەرىك سۇلتانوۆ شال اقىن اۋدانى تۇرعىندارىمەن كەزدەسىپ, قازاقستاندىقتار ۇشىن جايلى باسپانا الەۋمەتتىك ماڭىزى ايرىقشا ماسەلە بولىپ ەسەپتەلەتىنىن ءسوز ەتتى. وڭىردە 20 مىڭعا جۋىق ادام ءۇي كەزەگىندە تۇر. سالىمشىلاردىڭ «تۇرعىنۇيقۇرىلىس جيناق بانكىسىنە قۇيعان قاراجاتتارى 15 ميلليارد تەڭگەنى قۇرايدى. ەلباسىنىڭ ۇندەۋىن شالاقىندىقتار دا قىزۋ قولداپ وتىر. 15 پاتەرلىك ەكى ءۇي سالۋ ءۇشىن جوبالىق-سمەتالىق قۇجاتتار راسىمدەلىپ, وبلىستىق قازىنادان 200 ميلليون تەڭگە بولىنگەن. مەن اۋداندىق كىتاپحانادا ەڭبەك ەتەمىن. ايلىق جالاقىم – 49 مىڭ تەڭگە. ەندى ءبىز ۇشىن سالىق جۇكتەمەسى 10 ەسە ازايتىلىپ, 1 پايىزعا دەيىن تومەندەتىلدى. بۇل قادام ءبارىمىزدى قۋانتادى, دەدى جيىندا ءوز ويىن بىلدىرگەن كىتاپحاناشى ايگۇل تاسجانوۆا.
اۋدان اكىمى نۇرلان ەسىموۆ بىلتىر جوسپارداعى 90 ميلليون تەڭگەنىڭ ورنىنا 120 ميلليون تەڭگە جەڭىلدىكتى نەسيە بەرىلگەنىن, بيىل بۇل دەڭگەيدەن تومەندەمەيتىنىن العا تارتا كەلىپ, شاعىن نەسيە بەرۋدى كوبەيتۋ ءوزىن-ءوزى ەڭبەكپەن قامتىعاندار جانە جۇمىسسىزدار ءۇشىن ءتيىمدى تەتىك سانالاتىنىنا توقتالدى.
پارلامەنت ءماجىلىسى مەن سەنات دەپۋتاتتارىنىڭ كەزدەسۋلەرى 5 الەۋمەتتىك باستاما تۇرعىنداردىڭ جاعدايىن جاقسارتۋعا باعىتتالعان ماڭىزدى شارا, قولايلى تەتىك, قولايلى مۇمكىندىك ەكەنىن انىق بايقاتتى.
ءومىر ەسقالي, «ەگەمەن قازاقستان»